चितवन । निकुञ्जभित्र बिछ्याइएको भूमिगत लाइनमा समस्या आएसंगै तीन दिनदेखि अवरुद्ध रहेको माडीको विद्युत सेवा गएरातीबाट सुचारु भएको छ ।
निकुञ्जभित्र देउराली डाँडादेखि तलाउक्षेत्र सम्मको एक किलोमिटर केबुलमा ठाउँठाउँमा समस्या रहेको पत्ता लागेसंगै बिद्युत प्राविधिकहरुले राती अबेरसम्म केबुल मर्मत गरेका थिए । बिहीबार राती करीब ११ बजेबाट माडीको बिजुली सुचारू हुनसकेको हो ।
माडीमा विद्युत लैजान चितवन राष्ट्रिय निकुञ्जको आठ किलोमिटर क्षेत्रमा विद्युत लाइन भूमिगत गरिएको छ । सो केबुलमा पटक पटक समस्या आउने गरेको छ । यसका कारण केही घण्टादेखि एक महिना अवधीसम्म पनि बिजुली अवरुद्ध भएको विगत छ ।
सो केबुलसंगै बैंकल्पिक अर्को नयाँ केबुल राख्न नेपाल बिद्युत प्राधिकरणले पुरक वातावरणीय अध्ययन गरेपनि वन मन्त्रालयमा फाईल पेन्डिङ हुनाले भौतिक निर्माण कार्य अगाडि नबढेकाले मन्त्रालयको ध्यानाकर्षण गराउन माडी नगरप्रमुख ताराकाजी महतो र उपप्रमुख खेमप्रसाद महतो सहितको माडीको प्रतिनिधिमण्डल राजधानी काठमाडौं पुगेको छ ।स्वदेश एफएमको सहयोगमा
