चितवन। भरतपुर महानगरपालिकाले महानगरको बजारी क्षेत्रमा रहेको इन्टरनेटको तारलाई तत्काल व्यवस्थापन गर्न निर्देशन दिएको छ ।
महानगरपालिका कार्यबाहक नगर प्रमुख चित्रसेन अधिकारीले अव्यवस्थित केवल नेटवर्कका तारहरुलाई तत्काल ब्यबस्थापन गर्न ईन्टरनेट सेवा प्रदायक कम्पनीलाई निर्देशन दिएका हुन् ।
महानगरपालिकाले आज मंगलबार इन्टरनेट सेवा प्रदायक कम्पनीहरुसँग अव्यवस्थित केबल नेटवर्क ब्यबस्थापनका सम्बन्धमा आयोजना गरेको छलफल कार्यक्रममा कम्पनीका प्रतिनिधिलाई कुनै पनि बहानबाजी नगरी तत्काल कार्यन्वनय गर्न निर्देशन दिएका छन् । सहरी सौन्दर्यीकरण, विपद् न्यूनीकरण जस्ता विषयसँग जोडिएको मुद्दा भएको हुँदा यसमा गम्भीर भएर लाग्न महानगरमा सञ्चालित सबै सेवा प्रदायक कम्पनीलाई उनले आग्रह गरे ।
कार्यक्रममा भरतपुर महानगरपालिका वडा नम्बर १० का अध्यक्ष परमेश्वर खनाल, ८ का अध्यक्ष जिवनाथ कँडेल, ३ का अध्यक्ष बिकास थापा र ५ का अध्यक्ष युद्धप्रसाद श्रेष्ठले महानगर सफाइमा सबै एकजुट भएर लाग्नुपर्ने अवस्था आएको तर्क राखे । सामूहिक रुपमा क्षेत्र छुट्याएर सरसफाइमा लाग्नुपर्ने, सेवा प्रदायक कम्पनीहरुले तार छुट्टाएर मात्र सेवा उपलब्ध गराउनु पर्ने र वडा कार्यालय,विद्युत प्राधिकरण,नेपाल टेलिकम र सेवा प्रदायक कम्पनीबीच समन्वय हुन खाँचो रहेको समेत अध्यक्षहरुले औल्याएका छन् ।
भरतपुर महानगरपालिकामा अहिले ३० बढी इन्टरनेट सेवा प्रदायक कम्पनीहरु रहेका छन् । महानगरपालिकाले वडा नम्बर १,२, ३ र १० लाई इन्टरनेटको मुख्य बजार पकेट क्षेत्रको रुपमा लिएको छ ।
छलफल कार्यक्रममा नेपाल विद्युत् प्राधिकरण भरतपुर बितरण केन्द्रका प्रमुख प्रदिप पौडेलले समस्या विद्युत्का तारमा नभई केबल नेटवर्कका तारमा रहेको प्रष्ट पारे । ‘बजार कुरुप हुनुको मुख्य कारण पनि इन्टरनेटका तारहरु नै हो’ पौडेलले भने, ‘अझ त्यसमा अप्टिकल फाइबर मुख्य बाधकको रुपमा रहेको छ ।’
यता नेपाल टेलिकम भरतपुरका वरिष्ठ इञ्जिनियर चन्दन झाले नगर सफा गर्ने अभियानको थालनी भएकोमा खुसी व्यक्त गरे । उनले भने, ‘नेपाल टेलिकम बाधक छैन, कुरुप बजारलाई सुन्दर बनाउन हामी तयार छौ ।’
त्यस्तै भरतपुर महानगरका निमित्त प्रमुख प्रशासकीय अधिकृत उपेन्द्रराज पौड्यालले कार्ययोजना नै बनाएर केबल तार व्यवस्थापनमा लाग्नु पर्ने धारणा व्यक्त गरे । विद्युत,टेलिकम,सडक,खानेपानी र सेवा प्रदायक कम्पनीहरुले अपनत्व हुने गरी समन्वयकारी भूमिका निर्वाह गर्नुपर्नेमा उनले विचार राखे ।
