चितवन । जिल्ला प्रशासन कार्यालय चितवनले तिहार लक्षित गरी प्लाष्टिकको फूलको माला बिक्री वितरणमा प्रतिबन्ध लगाएको छ ।
प्रशासनले आज एक सुचना जारी गर्दै प्लाष्टिकजन्य फूलगुच्छा, माला लगायतका सामग्रीहरुको प्रयोग गर्ने प्रवृत्ति बढ्दै गएको देखिएको जनाएको छ । प्लाष्टिकजन्य बस्तुले वातावरणीय प्रदुषण गराउने, स्थानीय कृषकहरुबाट उत्पादित फूलले बजार नपाउने तथा ठूलो धनराशी बाहिरिने जस्ता समस्याहरु देखिएको प्रशासनले जनाएको छ।
नेपालमा हुने पुष्प खेती, पुष्प कृषक र पुष्प व्यवसायलाई संरक्षण र प्रोत्साहन गर्न सबैलाई अनुरोध गर्दै अनुगमनको क्रममा कही कतै प्लाष्टिकका फूल माला बिक्री गरिएको भेटिए कानुनी कारवाही गरिने सुचनामा उल्लेख छ ।
