चितवन । एसईई नतिजा आएसँगै चितवनमा कक्षा ११ को विद्यार्थी भर्ना अभियान सुरु भएको छ । प्रवेश परीक्षा लिँदै चितवनका माध्यमिक विद्यालय तथा कलेजहरुले विद्यार्थी भर्ना अभियान चलाइरहेको छन् । चितवनका विभिन्न कलेज तथा माध्यमिक विद्यालयहरुले साउन मसान्तसम्म भर्ना लिने जनाएका छन् ।
राष्ट्रिय परीक्षा बोर्ड सानोठिमीले कक्षा ११ मा साउन मसान्तसम्म विद्यार्थी भर्ना गर्ने व्यवस्था गर्न विद्यालयलाई निर्देशन दिएको छ। सोही निर्देशनलाई टेकेर यहाँका कलेज तथा माविहरुले साउन मसान्तसम्म विद्यार्थीहरुको भर्ना सक्ने जनाएका छन् । बोर्डले गत साउन ११ गते २०७८ सालको माध्यमिक शिक्षा परीक्षा अर्थात् एसइईको नतिजा सार्वजनिक गरेपछि कक्षा ११ पढाई हुने अधिकांश विद्यालयले एक साताभित्र विद्यार्थी भर्ना गर्ने गरी आवेदन आह्वान गरेपछि बोर्डले सार्वजनिक सूचना जारी गर्दै साउन मसान्तसम्म भर्नाको कार्य सक्ने भनेको छ ।
शैक्षिकसत्र २०७९ र ०८० का लागि कक्षा ११ मा विद्यार्थी भर्ना गर्ने सम्बन्धमा विभिन्न विद्यालयरक्याम्पसले फरकफरक भर्ना तालिका तय गरी छोटो समयको मात्र म्याद राखेपछि बोर्डले सूचना जारी गर्दै साउन मसान्तसम्म भर्ना गर्न निर्देदन दिएको हो । छोटो समयमा दुर्गम क्षेत्रका विद्यार्थीले भर्नाका लागि आवेदन दिने अवसरबाट वञ्चित हुने अवस्था रहेकोले सबै विद्यालयले एसइईको नतिजा सार्वजनिक भएको कम्तीमा १५ दिनसम्म आवेदन दिन सक्नेगरी भर्नाको व्यवस्था गर्न बोर्डले निर्देशन दिएको छ ।
बोर्डले साउन मसान्तसम्म विद्यार्थी भर्ना लिने व्यवस्था मिलाउन सम्बन्धित सबै विद्यालय एवं क्याम्पसलाई निर्देशन दिँदै स्थानीय तहलाई समेत आफ्नो पालिकाअन्तर्गतका विद्यालयमा समन्वय र सहजीकरण गरी विद्यार्थी भर्ना एवम् कक्षा सञ्चालनको व्यवस्था गर्न आग्रह गरेको छ ।
