बीरगंज ।पर्सा राष्ट्रिय निकुञ्जबाट आएको जङ्गली हात्तीले आक्रमण गर्दा आज बिहान बाराको कलैयामा एक जनाको मृत्यु भएको छ ।
हात्तीको आक्रमणबाट कलैया उपमहानगरपालिका–२ औधापुर निवासी ४५ वर्षीय रामदेव पटेलको मृत्यु भएको जिल्ला प्रहरी कार्यालय बाराका प्रवक्ता एवं डिएसपी गौतम मिश्रले जानकारी दिनुभयो ।
खेतमा काम गरिरहेका पटेललाई बिहान करिब पौने आठ बजे जङ्गली हात्तीले आक्रमण गरी गम्भीर घाइते बनाएको र उनलाई उपचारकालागि कलैया अस्पतालमा ल्याउँदै गर्दा बिच बाटोमै मृत्यु भएको मिश्रले बताउनुभयो ।
पर्सा राष्ट्रिय निकुञ्जबाट करिब १५/१६ किलोमिटर टाढा बस्तीमा प्रवेश गरी बारा जिल्लाको सदरमुकाम कलैयामा आइपुगेको हात्तीले पटेललाई आक्रमण गरेको प्रहरीले जनाएको छ ।
