चितवन।सोमेश्वरगढीमा कालीका पूजा गरी फर्किने क्रममा सम्पर्क बिहीन हुनपुगेकी एक बृद्धालाई भारततर्फको जंगलबाट माडीको शसस्त्र प्रहरीले उद्धार गरेको छ ।
भरतपुर महानगरपालिका-५ निवासी बर्ष ६० की सान्ता सेंढाई कालीका पूजा सकेर फर्किने क्रममा दिउँसो करीब १ बजे सम्पर्क विहीन हुनुभएको थियो । सो खबर पाएसंगै खोजीमा खटिएको सशस्त्र प्रहरी बलको बोर्डर आउट पोस्ट कल्याणपुर (राधापुर)को टोलीले बाटो बिराई भारततर्फ जाँदै गरेको अवस्थामा साँझ ५ बजेतिर सेंढाईलाई भेटेको हो ।
बृद्धालाई भारतको पश्चिम चम्पारण जिल्लाको त्रिबेणीनाला जंगल क्षेत्रबाट भारतीय सीमारक्षक एस.एस.बी. संगको समन्वयमा कुशल उद्धार गरी आफन्तको जिम्मा लगाइएको सशस्त्र प्रहरी निरीक्षक आन बहादुर गुरुङले जानकारी दिनुभयो । सशस्त्र प्रहरीको टोलीले हाल सोमेश्वरगढी मेलास्थलमा सुरक्षा एवं भक्तजनहरुलाई आवश्यक सहयोग समेत गरिरहेको उहाँले बताउनुभयो ।
