चितवन।भरतपुर महानगरपालिका वडा नं २९ मा खानेपानी आयोजना निर्माण भएसँगै काकाकुलको समस्या हटेको छ । वडा नं २९ को सबैभन्दा ठूलो समस्याको रूपमा रहेको खानेपानी समस्या अब सदाको लागि अन्त्य भएको महानगर प्रमुख रेनु दाहालले बताइन् ।
भरतपुर २९ मा २ वटा खानेपानी आयोजना सम्पन्न भएसँगै त्यहाँका स्थानीयले पानीको समस्या भोग्नुपर्ने अवस्था दुर भएको छ । ‘ढोडेनी खानेपानी र चौकीडांडा खानेपानीले २९ नं वडाबासी जनसमुदायलाई अब स्वच्छ सफा र सबर्सुलभ खानेपानीको सुनिश्चित्ता दिएको छ, योसँगै वडाबासीमा थप खुशियाली छाएको छ’ प्रमुख दाहालले बताइन् ।
भरतपुर महानगरपालिकाकी मेयर रेनु दाहाल र उपमेयर पार्वती शाह ठकुरीले आज संयुक्तरुपमा खानेपानी आयोजनाको उद्घाटन गरेका हुन्।
ढोडेनी खानेपानी आयेजनाबाट त्यस क्षेत्रका ८३ घर लाभान्वित हुने भएका छन् । सो आयोजना संघीय सरकारको बजेट एक करोड पाँच लाख, भरतपुर महानगरको ३५ लाख र बाँकी श्रमदान गरी डेढ करोड बढीको लागतमा सम्पन्न भएको हो ।
सोही वडाको चौकी डाँडा खानेपानी आयोजनाको पनि पानी वितरणको परीक्षण सम्पन्न भएको छ ।
यो आयोजना निर्माणको लागि संघीय सरकारले दुई करोड, प्रदेश सरकारले दुई करोड ३० लाख र श्रमदान गरी चार करोड ९२ लाखको लागतमा सम्पन्न भएको हो ।
