काठमाडौं। हिमालयन शेर्पा क्लबमाथि २-० को जितसहित थ्री स्टार क्लबले सहिद स्मारक ए डिभिजन लिगमा आफ्नो अपराजित यात्रा छैटौं खेलसम्म पुर्याएको छ ।
त्रिपुरेश्वरस्थित दशरथ रंगशालामा आइतबार सम्पन्न एक मात्रै खेलमा हिमालयन शेर्पाका रक्षक अमृत श्रेष्ठको आत्मघाती गोल र घानिफो अन्सुमानाले गोलगरेपछि थ्री स्टारले महत्त्वपूर्ण तीन अंकसहित आफ्नो अपराजित यात्रा छैटौं खेलमा पुर्याएको हो ।
५७ औं मिनेटमा थ्री स्टारका ऋतिक कुमार खड्काको प्रहार क्लियर गर्ने क्रममा अमृतको प्रहारले आफ्नै गोलपोस्टको दिशा लिएको थियो ।
९० मिनेटपछि १० मिनेटको इन्जुरी समयमा विदेशी खेलाडी घानिफोले लाकेन लिम्बूको पास सदुपयोग गर्दै विजयी गोल गरे ।
जितपछी थ्री स्टार आठ खेलमा १३ अंकसहित पाँचौ स्थानमा उक्लिदा समान खेलमा ११ अंक बटुलेको हिमालयन शेर्पा छैटौं स्थानमा झरेको छ ।
तेस्रो चरणमा सातदोबाटो युथसंग अप्रत्याशित नतिजापछी लगातार चार खेल बराबरी खेलेको थ्री स्टार सातौं चरणमा जावालाखेल युथ क्लबमाथिको जितसहित लयमा फर्किएको थियो । थ्री स्टारको यो लगातार दोस्रो जित हो ।
पछिल्लो तीन खेलमा शतप्रतिशत नतिजा ल्याएको हिमालयन शेर्पा भने चौथो खेलमा भने पराजित भयो ।
खेलमा दुबै टोलीले औषत प्रदर्शन संगै उतिकै अवसर बनाए ।
यसअघि १९औं मिनेटमा निशान खड्कको क्रसमा आयुस घलानको हेड गोलपोस्ट नजिकैबाट बाहिरिदा थ्री स्टारले अग्रता लिने अवसर गुमायो ।
३०औं मिनेटमा हेमन्त थापा मगरको कर्नरमा मिडफिल्डर राफेल रिमले गरेको हेडर क्रसबारमा लागेर फकिएको थियो ।
त्यसको पाँच मिनेटपछि संजोक राईको पासमा घनिफो अंशुमाना कोम्हको प्रहार गोलपोस्ट माथिबाट बाहिरिएको थियो ।
पहिलो हाफको इन्जुरी समयको पहिलो मिनेटमा पूर्णबहादुर गुरुङको प्रहार क्रसबारमा लागेर फर्कदा हिमालयन शेर्पाले खेलमा अघि बढ्ने अवसर खेर फालेको थियो ।
७३औं मिनेटमा हिमालयन शेर्पाले खेलमा फर्कने अवसर पाए पनि त्यसको सदुपयोग गर्न सकेन । हिमालयनका मुतम्बा पिस्टोनीले गरेको प्रहार थ्री स्टारका गोलकिपर प्रिसोले सहजै नियन्त्रणमा लिएका थिए ।
८३औं मिनेटमा हिमालयनका विजय श्रेष्ठको पासमा जीवन गुरुङको प्रहार प्रिसोले विफल पारेका थिए ।
सोमबार लिगमा एक खेल हुनेछ ।
