चितवन । नेकपा (एकीकृत समाजवादी) का अध्यक्ष एवं पूर्वप्रधानमन्त्री माधवकुमार नेपालले आउने निर्वाचनमा एमालेलाई धुलो पार्ने बताएका छन् ।
भरतपुरमा शुक्रबार दिउँसो जिल्लास्तरीय अगुवा कार्यकर्ता भेला तथा प्रशिक्षण कार्यक्रममा अध्यक्ष नेपालले भने, ‘कसरी धुलो पार्नेछौँ हेर्दै गए हुन्छ, अलिअलि धुलो होइन ।’
जनता नपाएर एमालेले क्रान्तिकारी झण्डा दुर्लभ एक सिंगे गैंडालाई बोकाएको आरोप लगाए । उनले भने, ‘एमालेसँग कोही कार्यकर्ता रहेनछन्, कार्यकर्ता नपाएर गैँडालाई झन्डा बोकाएका छन् ।’ उनले केपी ओली नेतृत्वको एमाले पतन हुने दावी गरे । ‘एमालेको हालत पतनको अवस्थामा छ, कसैले बचाउने वाला छैन’ उनले भने ।
