भरतपुर । चितवनको भरतपुर महानगरपालिकाको बसेनीमा रहेको १३२–११ केभी क्षमताको भरतपुर सवस्टेशनमा रहेका दुईवटै पावर ट्रान्सफर्मर पड्केपछि तिहारको समयमा ३६ घन्टा विद्युत् आपूर्ति बन्द भयो ।
भरतपुर महानगरका अधिकांश वडा अन्धकार भयो । तिहारको समयमा भरतपुर महानगर नै अन्धकार हुने स्थिति देखेपछि प्राधिकरणका कार्यकारी निर्देशक कुलमान घिसिङ नै भरतपुर आए । छिटो कामसक्न निर्देशन दिए । लक्ष्मीपुजाको दिन कतै विद्युत् आपूर्ति बन्द भएन । झिलिमिलि भयो भरतपुर ।
नेपाल विद्युत् प्राधिकरणले ट्रान्सफर्मर पूर्णरुपमा सञ्चालनमा आएपछि भरतपुर क्षेत्रमा रहेका उद्योगलाई पनि आइतबार साँझदेखि विद्युत् आपूर्ति दिएको छ ।
प्राधिकरणले बिग्रिएको ट्रान्सफर्मरलाई हटाएर सवस्टेशनमा जगेडामा रहेको २२।५ एमभिए क्षमताको ट्रान्सफर्मर जडान गरी बिहीबारबाट घरायसी ग्राहकका लागि विद्युत् आपूर्ति दिएको थियो । एउटा ट्रान्सफर्मर जडान गरी ३६ घण्टापछि विद्युत् आपूर्ति सुरु गरिएको थियो । कास्कीको लेखनाथ सवस्टेशनमा रहेको २२.५ एमभिए क्षमताको ट्रान्सफर्मरल्याई भरतपुर सवस्टेशनमा जडान गरी त्यसलाई पनि आइतबार साँझबाट सञ्चालनमा ल्याइएको हो ।
सवस्टेशनको क्षमता अब ४५ एमभिए रहेकाले औद्योगिकसहितका सबै ग्राहकलाई विद्युत् आपूर्तिको कुनै समस्या नरहेको प्राधिकरणको वितरण तथा ग्राहकसेवा केन्द्र भरतपुरका प्रमुख राजीवकुमार सिंहले बताए । उनले भने, ‘यतिबेला चितवनको एउटा घरमा पनि विद्युत् आपूर्ति बन्द भएको छैन ।’
सिंहका अनुसार आँपटारीस्थित अर्को १३२.११ केभीको सवस्टेशनमा १५ एमभिए क्षमताको ट्रान्सफर्मर जडान सुरु गरिएको छ । उनले भने, ‘क्षमता बढाइएको छ, अब फेरि लामो समय विद्युत् आपुर्ति बन्द हुँदैन भन्ने लागेको छ, तर भवितव्य घटना घट्यो भने त के भन्न सकिन्छ र ? उनले आठ दिनसम्म रातदिन काम गरेर यो अवस्थामा आएको उनको दावी थियो ।
