काठमाडौं । उपमेयर कप राष्ट्रिय महिला लिग छनोटको दोस्रो चरणको समीकरण पुरा भएको छ । अखिल नेपाल फुटबल संघ (एन्फा)ले आयोजा गरेको राष्ट्रिय लिग छनोट अन्तर्गत उपमेयर कपको १० समूहबाट १० टोली दोस्रो चरण तथा नकआउटमा प्रवेश पाएका छन् ।
यसअघि सहभागी ३१ क्लबलाई १० समूह विभाजन गरि लिग खेलाइएको थियो । प्रत्येक समूहबाट एक टोली दोस्रो चरणमा स्थान बनाएका छन् । सोमबारको खेलसँगै लिग खेलसमाप्त भएका छन् । अब, नकआउट चरणका खेल २२ कात्तिकबाट आयोजना हुनेछ ।
समूह ‘ए’ बाट समान ७ अंक भएपनि गोल अन्तरका आधारमा बाग्मती नगरपालिकालाई पछि पार्दै कनकाई नगरपालिका दोस्रो चरणमा स्थान बनाएको छ । कनकाईले ३२ गोल गर्दा बागमतीले १७ गोल गरेको थियो । दुबै टोलीले एक अर्काविरुद्ध एक एक गोल गरेका थिए । यस समूहमा तीन खेल खेलेको गोदावरी नगरपालिकाले तीन अंक बनाउँदा तेस्रो स्थानमा रह्यो भने तीन खेलमा ३३ गोल व्यहोरेको महालक्ष्मी नगरपालिका पुछारमा रहेर प्रतियोगिता टुंगायो ।
समूह ‘बी’ बाट ललितपुर महानगरपालिका दोस्रो चरणमा प्रवेश गर्याे । उसको चार अंक रह्यो । यता, तीन अंक बनाएको कागेश्वरी नगरपालिका दोस्रो रह्यो भने कालिका नगरपालिका एक अंकका साथ पुछारमा रह्यो । समूह ‘बी’ मा बलियो देखिएको कालिकाले नियमविपरीत पाँच विभागीय खेलाडी अनुबन्धन गरेपछि क्लबलाई ‘प्रोटेस्ट’ परेको थियो । अघिल्लो खेलमा कागेश्वरीलाई १०-० ले पराजित गरेको कालिकाले नियमअनुसार सो नतिजा कागेश्वरलाई ३-० ले बुझाएको थियो ।
समूह ‘सी’बाट बाँसगढी नगरपालिका छ अंकसहित अर्काे चरणमा प्रवेश पायो । तीन अंक जोडेकाे भक्तपुर नगरपालिका र बिना अंक २६ गोल व्यहोरेको पुतलीबजार स्वतः दोस्रो चरण बाहिर रहे । समूह ‘डी’ बाट छ अंक बनाएको शिवशक्ति नगरपालिका दोस्रो चरणमा स्थान बनाउँदा एक जित हात पारेको देभचुली नगरपालिका र जितविहीन रहेको जानकी नगरपालिका बाहिरिए ।
समूह ‘ई’बाट रोङ गाउँपालिको दोस्रो स्थानमा प्रवेश गरेको छ । समान चार अंक भए पनि यस समूहबाट काठमाडौं महानगरपालिका गोल अन्तरका आधार र बिना कुनै अंक २० गोल व्यहोरेको सिमकोट गाउँपालिका बाहिरिए ।
समूह ‘एफ’ बाट छ अंकका साथ तुल्सीपुर अर्काे चरणमा स्थान बनाउँदा तीन अंक जोडेको गैँडाकोट नगरपालिका र बिना कुनै अंक हेटौँडा नगरपालिका बाहिर रहे ।
समूह ‘जी’ बाट सात अंक बनाएको कैलालीको गोदावरी नगरपालिका छ अंक जोड्दै नकआउट चरणमा स्थान बनाउँदा वीरेन्द्रनगर नगरपालिका र पोखरा उपमहानगरपालिका अर्काे चरणमा स्थान बनाउन असफल रहे ।
समूह ‘एच’बाट समान चार अंक भए पनि गोकर्णेश्वर नगरपालिकालाई एक गोल अन्तरले पछि पार्दै धनगढी नगरपालिका दोस्रो चरणमा स्थान बनायो । यस समूहमा धनकुटा नगरपालिकाले नाै गोल व्यहोर्दा कुनै अंक बनाउन सकेन ।
समूह ‘आई’बाट समान चार अंक भए पनि एक गोलले बेदकोट नगरपालिकालाई पछि पार्दै गौरीगंगा नगरपालिका दोस्रो चरणमा प्रवेश गर्याे । बराहक्षेत्र नगरपालिकाले भने यस समूहबाट कुनै अंक जोड्न सकेन ।
समूह जे बाट सुनकोशी गाउँपालिका शत प्रतिशत जितका साथ नकआउट चरणमा स्थान बनायो । यस समूहबाट गत सिजन महिला लिग खेलेको चौदण्डीगढी नगरपालिका र धरान उपमहानगरपालिका बाहिरिए ।
दोस्रो चरण अर्थात नकआउट चरणका खेलहरू २२ कात्तिकबाट सुरू हुनेछन् । प्रतियोगिताको सहभागी क्लबहरूले विभागका चार खेलाडी अनुबन्धन गर्ने पाएका थिए ।यस प्रतियोगिताको फाइनलमा पुग्ने टोली टोली चैतमा आयोजना हुने महिला लिगमा छनोट हुनेछन् । मेयर कपको विजेताले पाँच लाख पाउँदा उपविजेताले तीन लाख पाउनेछ ।
नक आउटमा छनोट भएका टोलीहरु
समूह ए बाट कनकाई नगरपालिका
समूह बी बाट ललितपुर उपमहानगरपालिका
समूह सी बाट बांसगढी नगरपालिका
समूह डी बाट शिबशक्ति नगरपालिका
समूह ई बाट रोङ गाउ पालिका
समूह एफ बाट तुल्सीपुर नगरपालिका
समूह जी बाट कैलालीको गोदावरी नगरपालिका
समूह एच बाट धनगढी नगरपालिका
समूह आई बाट गौरिनगर नगरपालिका
समूह जे बाट सुनकोशी गाउँपालिका
