चितवन । राप्ती नगरपालिका-७ बीरेन्द्रनगरमा रहेको शहीद बलराम दुग्ध उत्पादक सहकारी संस्था लिमिटेडको अध्यक्षमा खेमराज पाठक निर्वाचित भएका छन् । काङ्ग्रेस र एमालेको वर्तमान सत्ता गठबन्धनलाई पराजित गर्दै पाठक अध्यक्षमा निर्वाचित भएका हुन् । पाठक नेकपा (माओवादी केन्द्र),नेकपा एकीकृत समाजवादी , रास्वपा र स्वतन्त्र गठबन्धनका उम्मेदवार हुन् ।
अध्यक्षमा निर्वाचित पाठकले उनका प्रत्यासी सत्ता गठबन्धनका उम्मेदवार मंगा तामाङलाई २१ मतान्तरले पराजित गरेका हुन् । पाठकले ३१४ मत प्राप्त गर्दा तामाङले २९४ मत पाए । उपाध्यक्षमा भने काङ्ग्रेस र एमालेबाट उम्मेदवारी दिएका नरहरि कँडेल निर्वाचित भएका छन् । कँडेलले २९५ तथा उनका प्रत्यासी रिमबहादुर घर्तिले २८७ मत ल्याए ।
सदस्यमा काङ्ग्रेस, एमाले गठबन्धनका त्रिलोचन कँडेल र केशव पौडेल निर्वाचित हुँदा अन्य सदस्यहरुमा अर्को गठबन्धनबाट प्रकाश चालिसे, लालप्रसाद सुवेदी, तुलसी पाठक, कमला पाठक, जमुना सापकोटा, ऋषिराम पाण्डे, हरिबाबु मरहठ्ठा, युवानन्द सापकोटा र मन्जा लामा विजयी भए ।
लेखा सुपरीवेक्षण समिति संयोजकमा माओवादी, समाजवादी, स्वतन्त्र पाटीको गठबन्धनका शिवराज अधिकारी २६० मतका साथ निर्वाचित भए । सदस्यहरुमा सोही गठबन्धनका अन्जन रेग्मी र युवकुमारी श्रेष्ठ विजयी भए । कुल ७०३ मतदाता रहे पनि निर्वाचनमा ६३७ मत खसेको थियो ।
