चितवन । नेपाल प्रिमियर लिग (एनपीएल)मा चितवन राइनोजले लगातार दोस्रो जित निकाल्ने क्रममा पोखरा एभेन्जर्सविरुद्ध ८७ रनको फराकिलो जित निकालेको छ ।
मंगलबार कीर्तिपुरस्थित त्रिवि क्रिकेटमा मैदानमा सम्पन्न खेलमा चितवनले प्रस्तुत गरेको १६२ रनको लक्ष्य पछ्याउने क्रममा पोखरा १३.२ ओभरमा ७४ रनमै समेटियो । प्रतियोगितामा चितवनको यो लगातार दोस्रो जित हो । चितवनले यसअघि पहिलो खेलमा काठमाडौं गुर्खाजविरुद्ध पाँच विकेटको जित निकालको थियो ।
पोखराका कुनै पनि ब्याटर खुलेर खेल्न सकेनन् । पोखराबाट नवौँ नम्बरमा ब्याटिङका निम्ति आएका नारायण जोशीले सर्वाधिक ३० रन बनाए । उनले २४ बलमा तीन चौका र दुई छक्का प्रहार गरे । मार्कस क्रितकेलीले १६ बलमा दुई चौकासहित १७ रन बनाए । यसबाहेक, अन्य ब्याटरले दोहोरो अंकमा रन जोड्न सकेनन् ।
पोखराले पहिलो पावर प्लेको पहिलो ओभरमा कप्तान कुशल भुर्तेल, दीलिप नाथ र बास डे लिडेलाई गुमाएको थियो । चितवनका सोहेल तान्विरले इनिङको पहिलो बलमै पोखराका कप्तान कुशललाई ‘रोयल डक’ गरे ।
यस्तै, चौथो बलमा चार रन बनाएका दीलिपलाई र त्यसपछि ब्याटिङमा आएका बास डे लिडेलाई ‘गोल्डेन डक’ गरे । यसपछि चौथो ओभरमा रिजन ढकालले पनि तीन विकेट लिए । सो ओभरको पहिलो बलमा रिजनले दीनेश खरेल, चौथो बलमा किरण ठगुन्ना र अन्तिम बलमा माइकल लिस्कलाई आउट गरे ।
सातौँ ओभरको दोस्रो बलमा चितवनका लुक बेन्केन्स्टाइनले पोखराका रेमन रेफरलाई विपीन रावलबाट क्याच गराए । रेफरले पोखराको खातामा एक रन थपे । ११औँ ओभरको दोस्रो बलमा पोखराका मार्कस क्रितकेलीलाई बेन्केन्स्टाइनले एलबीडब्लूको धरापमा पारे । १३औँ ओभरको पाँचौँ बलमा पोखराका नारायण जोशीलाई बेन्केन्स्टाइनले सन्तोष कार्कीबाट क्याच गराए । पोखराका दीनेश र किरणले समान एक रन बनाउँदा लियस्क ‘डक’ भए ।
चितवनका सोहेल तान्विर, रिजन र लुक बेन्केन्स्टाइनले समान तीन विकेट लिए । दीपक बोहराको नाममा एक विकेट रह्यो । समान तीन ओभर बलिङ गरेका तान्विर र रिजनले एक मेडन फ्याक्दै क्रमशः ६ र १० रन खर्चिए ।
पहिलो इनिङ : बोपाराको अर्धशतक
त्यसअघि टस हारेर ब्याटिङमा आएको चितवनले निर्धारित २० ओभरमा सात विकेट गुमाएर १६१ रनको योगफल खडा ग¥यो । चितवनका बोपाराले ५१ रन बनाए । बोपाराले ३८ बलमा तीन चौका र तीन छक्का प्रहार गरे ।
योसँगै बोपारा एनपीएलमा अर्धशतक प्रहार गर्ने पाँचौँ ब्याटर बने । यसअघि विराटनगरका मार्टिन गप्टिल, जनकपुरका अनिल साह र लहिरु मिलान्थासँगै सुदूरपश्चिम रोयल्सका दीपेन्द्रसिंह ऐरीले अर्धशतक बनाएका थिए ।
४६–३ को कठिन स्थितिबाट बोपाराले कप्तान कुशल मल्लसँग चौथो विकेटका निम्ति ६८ रनको साझेदारी गर्दै चितवनको इनिङ सम्हालेका थिए । बोपारा १६औँ ओभरको अन्तिम बलमा रेमन रेफरको बलिङमा मार्कस क्रितकेलीबाट क्याच हुँदै पभेलियन फर्किएका थिए ।
यी दुई क्रिजमा हुँदा चितवनले पहिलो १० ओभरमा ९३ रन बनाएको थियो । तर, यसपछिका ब्याटर क्रिजमा लामो समय टिक्न नसक्दा चितवन विशाल योगफलसम्म पुग्न सकेन । कुशलले २३ बलमा एक चौका र चार छक्कासहित ३८ रन बनाए । उनी १४औँ ओभरको दोस्रो बलमा सागर ढकालको बलिङमा कुशल भुर्तेलबाट क्याच आउट भएका थिए ।
यसबाहेक, लुक बेन्केन्स्टाइनले १६ रन बनाएका थिए । छैटौँ ओभरका दोस्रो बलमा बास डे लिडेले गरेको बलिङमा कुशल भुर्तेलबाट क्याच हुनुअघि बेन्केन्स्टाइनले १३ बलमा एक चौका र दुई छक्का प्रहार गरे । ओपनर हसन आइसाखिलले १० बलमा एक चौका र एक छक्कासहित १४ रन बनाए ।
हसन पाँचौँ ओभरको पहिलो बलमा विपीन खत्रीको बलिङमा कुशल भुर्तेलबाट क्याच भएका थिए । सन्तोष खत्रीले १३ बलमा ११ रन थपे । उनी रेमन रेफरले गरेको १८औँ ओभरको पाँचौँ बलमा विपीन खत्रीबाट क्याच भए । अविजित रहेका अमर रौटेलाले १३ र शदर भेषवाकरले ११ रन बनाए । दीपक बोहराले दुई रन थप्दा सोहेल तान्विर भने ‘गोल्डेन डक’ भए ।
दीपकलाई पोखराका विपीनले बोल्ड गर्दा तान्विर बास डे लिडेको बलमा एलबीडब्लूको सिकार बने । पोखराका विपीन खत्री, बास डे लिडे र रेमन रेफरले समान दुई विकेट लिए । सागर ढकालको नाममा एक विकेट रह्यो ।
प्रतियोगितामा चितवनको यो दोस्रो खेल हो । चितवनले यसअघि आफ्नो पहिलो खेलमा काठमाडौं गुर्खाजविरुद्ध पाँच विकेटको जित निकालेको थियो । पोखराको भने प्रतियोगिताको पहिलो खेल हो ।
यसअघि आजै भएको पहिलो खेलमा सुदूरपश्चिम रोयल्सले विराटनगर किंग्सविरुद्ध ९० रनको जित दर्ता गरेको थियो । प्रतियोगितामा बुधबार पनि दुई खेलहरू हुँदै छन् । बुधबारको पहिलो खेलमा कर्णाली याक्सविरुद्ध काठमाडौं गुर्खाज र दोस्रो खेलमा लुम्बिनी लायन्सविरुद्ध विराटनगर किंग्सले खेल्नेछन् ।
