गैँडाकोट । नवलपुरको गैँडाकोटस्थित नारायणी नदी किनारमा सुरु भएको ‘दोस्रो गण्डकी प्रदेश महोत्सव–२०८१’ को दोस्रो दिन आज (मंगलबार) कलाकार रमेशराज भट्टराईको प्रस्तुती रहने आयोजकले जानकारी दिएको छ ।

आज ठूली एकादशीको दिनसमेत परेको र गण्डकी प्रदेश महोत्सवमा कलाकार भट्टराईले आफ्ना चर्चित गीतहरु गाएर दर्शकलाई मनोरञ्जन दिने महोत्सव मूल समिति संयोजक एवम् नेपाल उद्योग वाणिज्य महासङ्घ गण्डकी प्रदेशका अध्यक्ष अमृत भट्टचनले बताउनुभयो । भट्टराई आज अपराह्न ४ बजे महोत्सव स्थल पुगेर बहुला, भन साइँलालगायत ६ वटा भन्दा बढी चर्चित गीतहरु गाउने भट्टचनको भनाइ छ । भट्टराईसँगै महोत्सवको सांस्कृतिक कार्यक्रममा उमदेवी खनाल र स्थानीय कलाकारहरुको प्रस्तुती रहने मूल संयोजक भट्टचनले जानकारी दिनुभयो ।

कात्तिक २६ देखि सुरु भएको महोत्सव मंसिर १० गतेसम्म सञ्चालन हुनेछ । तीन सय वटा स्टल रहने महोत्सवमा ५० वटा स्टलहरु कृषि तथा स्थानीय उत्पादन प्रवद्र्धनका लागि निःशुल्करुपमा उपलब्ध गराइएको छ । महोत्सवको मुख्य आकर्षणको रुपमा अन्डर वाटर फिस टनेल निर्माण गरिएको छ भने महोत्सवमा विभिन्न दैनिक उपभोग्य वस्तु, कपडा, अटो, सूचना र प्रविधि, सौन्दर्य सामग्रीलगायतको प्रदर्शनी राखिएको छ । त्यसैगरी, विभिन्न जातजातिको सांस्कृतिक घरसमेत राखिएका छन् । महोत्सव प्रवेशको लागि टिकटदर रु ८० तथा विद्यार्थीका लागि रु ५० कायम गरिएको छ भने ७० वर्षमाथीका ज्येष्ठ नागरिकलाई निःशुल्क प्रवेशको व्यवस्था गरिएको छ ।