चितवन । नारायणगढ–मुग्लिन सडकखण्ड अन्तर्गत भरतपुर महानगरपालिका–२९ घुमाउनेमा आज बिहान यात्रुबहाक बस दुर्घटनामा परेको छ । महेन्द्रनगरबाट काठमाडौं जाँदै गरेको सुदूरपश्चिम प्रदेश ०२–००१ ख १३३२ नम्बरको बस दुर्घटनामा परेकाे हाे । दुर्घटनामा १५ जना यात्रु घाइते भएका छन् । उनीहरुलाई उपचारका लागि भरतपुर ल्याइएको छ। बसमा ३४ जना सवार रहेको बताइएको छ ।घाइते सबैको चितवन मेडिकल कलेजमा उपचार भइरहेको छ ।
आज बिहान ७ः१५ बजेको समयमा बस आफै अनियन्त्रित भई सडक साईडको डिभाईडरमा ठोक्किएको जिल्ला प्रहरी कार्यालय चितवनका प्रवक्ता भेषराज रिजालले जानकारी दिए ।
डिभाइडरका कारण ठूलो क्षति हुनबाट जोगिएको छ । डिभाइडरले बसलाई नदीमा खस्नबाट जोगाएको हो ।
