चितवन । चितवनको छुट्टाछुट्टै स्थानबाट प्रतिबन्धित लागूऔषध तथा मोटरसाईकल सहित चार जनालाई प्रहरीले पक्राउ गरेको छ । जिल्ला प्रहरी कार्यालय चितवनका अनुसार बिशेष सूचनाको आधारमा खटिएको प्रहरीको विशेष टोलीले हिजो (शनिबार) बिहान भरतपुर महानगरपालिका १ स्थित सडक खण्डबाट प्रतिबन्धित २८५ एम्पुल लागूऔषध सहित पर्सा निर्मलवस्ती घर भई हाल कालिका नगरपालिका १ मा डेरा गरी बस्ने २९ बर्षीया बिकास स्याङतान र सोही ठाउँ बस्ने २७ बर्षीया बिकास गुरुङलाई प्रहरीले पक्राउ गरेको हो ।
पुल्चोकबाट आँपटारीतर्फ जाँदै गरेको अवस्थामा उनीहरू सवार ना २८ प २७०८ नंम्बरको मोटरसाईकललाई रोकी चेकजाँच गर्दा लुकाई छिपाई ल्याएको लागूऔषध डाईजेपाम ९५ एम्पुल, ब्युनोर्फिन ९५ एम्पुल र फेनार्गन ९५ एम्पुल गरी २८५ एम्पुल र मोटरसाईकलसहित नियन्त्रणमा लिईएको प्रहरीले जनाएको छ ।
त्यस्तै, हिजो शनिबार नै प्रहरीले भरतपुर महानगरपालिका वडा नंम्बर १ स्थित पोखरा बसपार्क टोलबाट समेत तीन सय एम्पुल लागूऔषधसहित भरतपुर महानगरपालिका वडा नम्बर २६ बस्ने २८ बर्षीया ओम बहादुर बस्यौला र सोही ठाउँ बस्ने २७ बर्षीया अजय बि.कलाई समेत नियन्त्रणमा लिएको छ ।
उनीहरूको डेरामा प्रहरीले खानतलासी गर्दा लुकाईछिपाई राखिएको अवस्थामा लागूऔषध डाईजेपाम एक सय एम्पुल, नुफिन एक सय एम्पुल र फेनार्गन एक सय एम्पुल गरी तीन सय एम्पुल लागूऔषधसहित पक्राउ गरिएको जिल्ला प्रहरी कार्यालय चितवनले जनाएको छ ।
पक्राउ परेका चारै जना उपर चितवन जिल्ला अदालतबाट लागूऔषध कसुर ऐन अन्तर्गत मुद्दामा म्याद थप गरी अनुसन्धान गर्ने कार्य भईरहेको जिल्ला प्रहरी कार्यालय चितवनका प्रहरी प्रवक्ता विजयराज पण्डितले जानकारी दिए ।
