चितवन। यहाँ गर्न लागिएको चितवन महोत्सवबाट नवउद्यमीको खोजी गरिने भएको छ । महोत्सव अवधिभर उद्यम गर्न चाहने युवाको तथ्याङ्क सङ्कलन गरेर उनीहरूलाई उद्यमतर्फ लगाइने भएको हो ।

महोत्सवको आयोजक उद्योग वाणिज्य सङ्घ चितवनका अध्यक्ष नुनारायण श्रेष्ठले सङ्घको रोजगार तथा व्यवसाय सूचना केन्द्रमार्फत युवालाई उद्यमी र रोजगारीमा लगाइने बताउनुभयो । उहाँले भन्नुभयो, “उद्यम गर्न चाहनेलाई आवश्यक सहजीकरण गरी उद्यमी बनाइने छ ।”

सङ्घले यही पुस २५ गतेदेखि माघ ४ गतेसम्म नारायणगढको नारायणी नदी किनारमा महोत्सव आयोजना गर्न लागेको छ । शिक्षा, स्वास्थ्य, कृषि र बसोबासका लागि चितवन भन्ने मान्यतालाई आत्मसात् गर्दै महोत्सव आयोजना गर्न लागिएको उहाँको भनाइ छ । सङ्घले आज यहाँ पत्रकार सम्मेलको आयोजना गरी हरेक दुई÷दुई वर्षमा हुँदै आएको यस महोत्सव १४ औँ संस्करणका रूपमा गर्न लागिएको जानकारी दिएको छ ।

विसं २०५३ देखि आयोजना हुँदै आएको यस महोत्सवले कोभिड–१९ पछि सिर्जित परिस्थितिमा यहाँको पर्यटनलाई केन्द्रविन्दुमा राखेर प्रचारप्रसार गर्ने छ । महोत्सवमा चितवनको विविधताको प्रतिनिधित्व गर्ने कृत्रिम पार्क निर्माण गरिने श्रेष्ठले जानकारी दिनुभयो । कोभिड र तत्पश्चात् विश्व परिवेशमा व्याप्त आर्थिकमन्दीका कारण विक्षिप्त आर्थिक क्षेत्र, हतोत्साहित भएका उद्यमी, व्यवसायी र आमसर्वसाधारणलाई आर्थिक पुनःरुत्थानको एउटा नयाँ दियो बाल्न महोत्सव सहयोगी बन्ने आयोजकले विश्वास लिएको छ ।

महोत्सवमा सात वटा विशेष स्टल, डोम र कृषि परिसर, अटो परिसर, सूचना प्रविधि परिसर, मेडइन नेपाल परिसर र घरेलु तथा साना उद्योगका लागि आवश्यक मेसिनरी सामानको स्टल एवं विभिन्न सङ्घ संस्थाका स्टल, रेष्टुराँ रहने छन् ।

महोत्सवमा चार सय ५० स्टल रहने छन् । आन्तरिक तथा बाह्य पर्यटकसहित पाँच लाख दर्शकले अवलोकन गर्ने र रु २५ करोडभन्दा बढीको कारोबार हुने आयोजकले अपेक्षा लिएको छ । महोत्सवकै अवसरमा पुस २८ गतेदेखि माघ २ गतेसम्म क्याम्पा चौरमा फुड फेस्टिभलको आयोजना गरिने छ ।