चितवन । शिक्षा मन्त्रालयको राष्ट्रपति शैक्षिक सुधार कार्यक्रम अन्तरगत माडीका पाँचवटा विद्यालयहरुमा भवन निर्माण हुने भएको छ ।
शिक्षा, विज्ञान तथा प्रविधि मन्त्री देवेन्द्र पौडेलको (मन्त्रीस्तरीय) निणर्यबाट प्रस्तावित वडा नं. १० हनुमानझुलास्थित सगरमाथा मा.वि., वडा नं. ९ स्थित कृष्णनगर माध्यमिक विद्यालय, वडा नं. ५ स्थित ब्रह्मज्योति आधारभूत विद्यालय र वडा नं. १ स्थित बाल्मीकि आधारभूत विद्यालयमा ४ कोठे भवन निर्माणका लागि प्रति विद्यालय ४५ लाख रुपैंया विनियोजन भएको हो ।
त्यस्तै, सोही कार्यक्रम अन्तरगत माडी ६स्थित शिशुकल्याण आधारभूत विद्यालयमा २ कोठे भवन निर्माणका लागि २२ लाख ५० हजार रुपैंया विनियोजन भएको छ । यसबाहेक आधारभूत विद्यालय रत्नपुर सेरुवा र दिवाकर स्मृति माध्यमिक विद्यालय रमाइलोडाँडाका लागि सुचना प्रविधी ल्याब स्थापनाका लागि प्रति विद्यालय ६ लाख ५० हजार रुपैंया स्वीकृत भएको माडी नगरपालिका शिक्षा शाखाले जनाएको छ ।
राष्ट्रपति शैक्षिक सुधार कार्यक्रममा देशभरका करीब १३ हजार विद्यालयहरुले आवेदन गरेका थिए । ८ अर्ब ८७ करोड रुपैयाँको यो कार्यक्रम एकै वर्षमा खर्च हुने सरकारको महत्वकांक्षी बजेट हो ।स्वदेश एफएमको सहयोगमा
