काठमाडौं । नेपाली कांग्रेसका सभापति शेरबहादुर देउवाले आज (मंगलवार) प्रधानमन्त्रीको शपथ लिने भएका छन् ।
उनले साँझ ५ बजे प्रधानमन्त्रीको शपथ लिने तयारी चलिरहेको सचिवालयले जानकारी दिएको छ ।
सोमवार सर्वोच्च अदालतले २८ घण्टाभित्र देउवालाई प्रधानमन्त्री नियुक्त गर्न आदेश दिएको थियो । त्यसबमोजिम राष्ट्रपति कार्यालयले शपथको तयारी अघि बढाएको जानकारी दिइएको छ ।
सर्वोच्च अदालतले प्रधानमन्त्री केपी शर्मा ओलीले दोस्रो पटक गरेको प्रतिनिधि सभा विघटन बदर गर्नुका साथै देउवालाई मंगलवार साँझ ५ बजेसम्म प्रधानमन्त्रीमा नियुक्त गर्न आदेश दिएको थियो ।
साथै, देउवाले आजै सानो आकारको मन्त्रिपरिषद गठन गर्ने तयारी गरेका छन् । त्यसका लागि देउवा आन्तरिक परामर्शमा व्यस्त रहेको बताइएको छ । यसअघि देउवा चार पटकसम्म प्रधानमन्त्री बनिसकेका छन् ।
