चितवन । माडी नगरपालिका वडा नं ९ स्थित हनुमानझुलाको एक घरमा लागेको आगोले ७० हजार नगद जलेर नष्ट भएको छ । माडी हनुमानझुला निवासी मन बहादुर पौडेलको घरमा आगलागी हुदाँ नगद जलेर नष्ट भएको हो ।
आगलागीमा पौडेलको घरबाट नगद बाहेक लत्ताकपडा, कागजपत्र अन्न अनाज, लगायत सबै चिजबिज जलेर नष्ट भएको छ । त्यस्तै घर पूर्ण रुपमा क्षतिग्रस्त भएको छ । खरको छानो भएको सो घरमा शुक्रबार दिउँसो तरकारी बनाउने क्रममा आगलागी भएको जनाइएको छ । आगलागी अरु घरमा फैलिन नपाउँदै स्थानीयहरूको सामूहिक प्रयासबाट आगो नियन्त्रणमा आएको थियो ।
आगलागीबाट बेघर भएसँगै पौडेल परिवारलाई स्थानियहरुको समन्वयमा त्रिपालको छाप्रो बनाई खाद्यान्न, भाँडाकुँडा सहयोग गरिएको छ ।(स्वदेशएफएमबाट)
