चितवन। देवघाटमा जारी महामहोत्सवमा आज इन्द्रेणी परिवारका कृष्ण कँडेल, राष्ट्रिय लोकदोहोरी प्रतिष्ठानकी उपाध्यक्ष राधिका हमालसहितको टोलीले भव्य उपस्थिति जनाए। भरतपुर महानगरपालिकाकी मेयर रेणु दाहालले विशेष रूपमा स्वागत गर्दै इन्द्रेणी परिवारको धार्मिक, सांस्कृतिक प्रवर्द्धनमा गरेको योगदानको उच्च प्रशंसा गरिन्।
महामहोत्सवको अवसरमा इन्द्रेणी परिवारले भक्तिमय भजन, भजन दोहोरी, र अन्य सांस्कृतिक प्रस्तुति दिँदै भक्तजनहरूलाई झुमाए। भजनमा समाहित गहिरो अध्यात्मिक भावनाले भक्तजनहरूमा अझ बढी धार्मिक उर्जा थपिएको देखिन्थ्यो। विशेषगरी कृष्ण कँडेल र राधिका हमालको उत्साहजनक प्रस्तुति र संवादले श्रद्धालु भक्तजनहरूलाई अझ बढी आकर्षित गरेको थियो।
इन्द्रेणी परिवारको प्रस्तुति हेर्न विशाल संख्यामा भक्तजनहरूको उपस्थित देखियो। भक्तजनहरूले इन्द्रेणी परिवारका कलाकारहरूसँग फोटो खिच्ने, भजनमा सामूहिक रूपमा सहभागिता जनाउने, र कार्यक्रमको भरपूर आनन्द लिने अवसर पाए। सांस्कृतिक तथा धार्मिक कार्यक्रमलाई भक्तजनहरूले भक्तिपूर्ण उत्सवको रूपमा लिएको देखिन्थ्यो।
महामहोत्सवका संकल्पकर्ता इश्वरकृष्ण महाराजले इन्द्रेणी परिवारको आगमन र योगदानको प्रशंसा गर्दै महामहोत्सवलाई भव्य बनाउन सहयोग गरेकोमा धन्यवाद प्रकट गर्नुभयो ।
भरतपुर महानगरपालिकाकी मेयर रेणु दाहालले देवघाट क्षेत्रको धार्मिक पर्यटन प्रवर्द्धनमा यस्ता कार्यक्रमहरू महत्त्वपूर्ण हुने बताउँदै, महानगरपालिकाले आवश्यक सहयोग गर्ने प्रतिबद्धता जनाइन्।
इन्द्रेणी परिवारको आगमनसँगै देवघाट महामहोत्सव झन् भव्य र उल्लासमय बनेको छ।भक्तजनहरूलाई भजन, लोकदोहोरी, र सांस्कृतिक प्रस्तुति मार्फत धार्मिक ऊर्जा प्रदान गरिएको छ।
यस महामहोत्सवले धार्मिक आस्था मात्र नभई सांस्कृतिक प्रवर्द्धनलाई पनि मजबुत बनाउने संकेत गरेको छ।
