चितवन । तेस्रो खैरहनी महोत्सवलाई लक्षित गर्दै आयोजक उद्योग बाणिज्य संघ खैरहनीले थप आकर्षक कार्यक्रम ल्याएको छ ।
महोत्सवको अवसरमा संघको आयोजनामा बुधबार रक्तदान कार्यक्रम हुदैछ । महोत्सव परिसरमा हुने कार्यक्रममा सहभागी भएर रक्तदान गरे आयोजकले एउटा टिकट उपहार स्वरुप दिनेछ । महोत्सव परिसर बाहिर हेल्थ डेस्क रहने छ,जहाँ स्वास्थ्य परिक्षण गरिनेछ,रक्तदान गर्न योग्य भए साथमा एउटा टिकट दिएर प्रवेश गराउनेछौ,संघका अध्यक्ष एवं महोत्सवका संयोजक कुमार खनालले भने । आकर्षक कार्यक्रम अन्तर्गत आयोजकले महोत्सव अवलोकनका लागि टिकट काटे मौलाकालिका केवलकारमा र म्याङ्गो जनज्योति हल पर्सामा ५० प्रतिशत छुटको ब्यबस्था गरेको छ ।

यसबीच महोत्सवलाई आकर्षण बढाउन चर्चित कलाकारलाई आयोजकले स्थान दिएको छ । महोत्सवको सांस्कृतिक कार्यक्रमका लागि बुधबार चर्चित अभिनेता पल शाह आउंदैछन । त्यस्तै शान्ति रानी परियार,सुप्रिम मल्ल ठकुरी ,पुजा देवकोटा, सन्तोष थिङ लगायत कलाकारको प्रस्तुति रहने संघका वरिष्ठ उपाध्यक्ष एवं कल,सांस्कृतिक समितिका संयोजक अर्जुन लम्सालले जानकारी दिए । पुस ५ गतेदेखि सुरु भएको महोत्सव १६ गतेसम्म चल्ने छ भने यहि अबधीमा पुस १३ गतेदेखि १५ गतेसम्म पर्सामा फुड फेस्टिवल समेत आयोजना गरिदैछ ।